Kita kita...napanood mo na?

Isa, isang beses kong sinabi na hinding-hindi ako manonood ng pelikulang yan.

Bakit ang daming nanonood maganda ba yan?

Dalawa, dalawang beses akong nakatulog habang pinapanood ko siya. Pagod kasi ako galing sa work.

Tatlo, tatlong beses ko siyang paulit-ulit na pinanood upang makagawa ng magandang blog kasi nga maganda ang pagkakagawa ng pelikula.

DISCLAIMER: Hindi ko kayang mag-enumerate ng mula isa hanggang sampung dahilan gaya ni Lea at Tonyo...masyadong marami at mahaba. Ha ha ha!

BAKIT DAPAT PANOORIN MO ANG PELIKULA?

Kung hindi ka pa nakakarating o nakakabiyahe papuntang Japan iminumungkahi ko na panoorin ito.

Dahil nga isang “Tourist Guide,” si Lea ang isa sa mga bida (dalawa lang pala sila ditong pangunahing aktor, yung isa si Tonyo),  iiikot niya kayo sa mga tourist spots doon.

Gaya ng “OTARU CANAL,” na kung saan unang nag”DATE,” ang dalawa.

Nandiyan din ang “SASHIME STREET,” na pabirong binanggit ni Tonyo sa pelikula na kung saan sinabi naman ni Lea na ang tamang pangalan ng lugar ay “FUSHIMI-INARI SHRINE.”

Nakita rin natin na binisita ng dalawa ang “MOUNT MOIWA OBSERVATION DECK,” na matatagpuan din naman pala sa SAPORRO CITY. Dito nakitang nagkalembang ng kampana o “bell,” ang dalawa. Kasama rin ng isa pang eksena kung saan gumamit sila ng “LOVE PADLOCKS.”

Ang “ODORI PARK,” ay ginamit ring lokasyon sa pelikula dito matatandaang hinintay ni Lea ang kasalukuyang “fiancee’,” niyang si Novu.

At ang “MOERENUMA PARK,”  na nasa “HIGASHI-KU, SAPORRO,” kung saan makikita ang glass pyramid na dinisenyo ng Japanese-American artist and landscape Architect na si Isamu Noguchi.

Yung lugar naman kung saan maraming makukulay na bulaklak ay nasa “BIEI,” (Kamikawa) na sa Hokkaido rin sa Japan. Pero yung mismong lugar ay kilala sa tawag na...”SHIKISAI HILL,” isang malawak na park na may iba’t-ibang kulay ng mga bulaklak na tanim gaya ng yellow Sunflowers at marami pang iba.

Maging ang lugar kung saan matatagpuan ang pinakamataas na bundok sa HOKKAIDO, ang...”MOUNT ASAHI (HIGASHIKAWA) ay makikita mo rin sa pelikula kapag binisita mo ang “DAISETSUZAN NATIONAL PARK.”

At ang resort kung saan nagbabad ng mga paa si Lea at si Tonyo ay  sa “ASAHIDAKE ONSEN,  isang maliit na hot spring at Japanese public bath na kung tawagin ay “ASHIYU!”

HITIK ANG PELIKULA SA MAGAGANDA AT NAKAKATAWANG LINYA

“Kung saan ka man wag ka ng magpapakita sa ‘kin. ‘Wag ka ng magpaparinig sa akin.”-LEA

“Ano mga plants...kaya ninyo pa bang maging plants? Papunta na kasi kayo sa Zombies.” –TONYO

“Mas matangkad ba ko sayo? –LEA

Huwag kang maingay sayo ko lang sasabihin ‘to...hindi pa kasi ako tuli.” –TONYO

“Hindi mo siya kailangang makita, parang sa CR yun pag-jingle mo yung huling patak...kikiligin ka.” –TONYO

“Ewan ko feeling ko ang tagal tagal na nating magkakilala.”-LEA

Oo. Ay Oo magdadalawang liggo na di ba? –TONYO

“Humuling ka kaya dito sa Sashimi Street. “-TONYO

“Fushimi-Inari Shrine!”-LEA

“Nagluto ako ng adobo at saka lumpiang hubad.”-TONYO

MATUTO NG ILANG LENGWAHENG HAPONES

Kung gusto mong sabihin ang salitang “See you later,”

Bigkasin lang ang salitang “Ja ne.”

At matutong magpasalamat sa kanilang wika sa pagsasabi ng...”Arigato Guzaimaso.”

At kung ikaw naman ay talagang palabati simulan ang pagsasabi sayong mga makakasalubong ng...”Konichiwa,” o “Hello!”

Ilan ito sa mga binigkas na linya na madaling intindihin kasabay ng mga simpleng galaw na kasama sa pagbigkas ng mga ito.

Bagamat may mga salitang madaling maintindihan, marami rin namang mga salita sa wikang hapon na mahirap talagang maintindihan.  Kagaya ng usapang naganap sa pagitan ng dalawang hapones habang itinotour sila ni Lea.

Maging yung eksena kung saan kinakausap ni Lea yung bata sa park ay nangangailangan din ng translation.

At ang paguusap ni Novu at Lea habang pinapanood sila ni Tonyo mula sa malayo.

ANG MALALAPIT NA KUHA

Angkop na angkop ang mga piniling kuha tuwing magkakaroon ng eksena si Lea at Tonyo...malapitan upang madama higit sa lahat ang nabubuong relasyon ng dalawa.

Bagama’t maganda ang lokasyon ng bawat lugar higit na binigyang pansin ang malapitang galaw ng mga aktor kung saan nagkakaroon  ng pagkakataon ang mga manonood na mapasok ang saloobin at damdamin ng karakter na ginagampanan ng dalawa kaya naman naka-relate ng husto ang mga manonood.

Hindi gaya ng ibang mga pelikulang ginawa na marami ang mga karakter...ang pelikulang ito ay nakatuon lamang sa bidang si Lea at Tonyo.

ISTILO NGPELIKULA UPANG MAGKUWENTO

Magkadikit ang kasalukuyan at nakaraan bagay na nakakatulong upang mabilis na maintindihan ng mga manonood ang pelikula.

Gumamit ng numero mula isa hanggang sampu upang ilarawan ang bawat nararamdaman at nakalipas na karanasan.

Pareho ng istilo si Lea sa pagpapakita ng galit sa nooy dating nobyo na niloko siya at sa kabilang banda naman si Tonyo sa paglalarawan kung paano namukadkad ang kanyang pagibig sa noo’y tinatanging si Lea kasama ng mga naging nakarang karanasan nito.

Sa pelikula ipinakita rin na hindi pala si Tonyo ang unang nakakita kay Lea kundi si Lea pala ang naunang nakakita kay Tonyo. Bagay na malinaw na naikuwento sa pelikula.

MGA DI MALILIMUTANG EKSENA

Nangunguna diyan yung pumasyal si Tonyo at Lea sakay ng isang bangka sa OTARU CANAL.

Simple lang yung eksena magkatabi sila tapos para makapagkuwento ng istorya at makita ang nabubuong relasyo ng dalawa...pinutol putol ng eksena kung saan naguusap lamang sila, simple pero romantic at tunay na nakakatawa.

Si Lea ng tunguhin nito ang bahay ng noo’y yumaong si Tonyo at nakita at binasa ang sulat na iniwan sa kanya. Ang sulat ay naglalaman ng mga bagay na hindi pa alam ni Lea tungkol sa kanya.

At ang huling bahagi kung saan kukurot sa iyong puso ang eksena kung saan binalikan lahat ni Lea ang mga lugar na kanilang pinuntahan ni Tonyo noong nabubuhay pa ito. Pero upang malinaw na mabalikan ang nakaraan gumamit ito ng panyo upang piringan ang kanyang mga mata.

Ang eksenang ito ay lalo pang pinag-alab ng awitin o OST ng pelikula na “Two Less Lonely People in the world,” na bersyon naman ni KZ Tandingan.

Masining na Pagkukuwento: Ikatlong Karangalan sa Pansangay na Paligsahan

Sa pagkakawagi ni Althea sa nagdaang "Masining Na Pagkukuwento," sa buong

District 1 sa Navotas nitong ika-14 ng Agosto 2017, kung saan nakatunggali nito ang walo pang magkakaibang eskwelahan...nito namang nakaraang ika-18 ng parehong buwan at taon kailangan niya muling idepensa ang kanyang titulo sa mga nagwagi pang magaaral sa Pansangay na Paligsahan.

Mula naman sa 9 na kalahok, ngayon anim naman silang maghaharap-harap upang patunayan ang kanilang galing sa naturang paligsahan.

ANO ANG PINAGKAIBA NITO SA UNANG NAGANAP NA MASINING NA PAGKUKUWENTO?

Halos wala namang pinagkaiba...dahil isang libro pa rin ang ang kanilang babasahin mula sa maikling kuwento na pinamagatang..."Bakit matagal ang sundo ko? sa panulat ni Kristine Canon at guhit ni Mariano Ching.

Noon mas marami ang kailangang salaing mga kalahok dahil pinipili pa lamang ang mga mananalo sa bawat distrito sa lungsod ng Navotas partikular na sa unang Distrito nito. Ngunit ngayon, maghaharap ang mga nagwagi sa una, pangalawa at pangatlong puwesto ng pansangay na paligsahan mula sa una at pangalawang distrito ng lungsod.

Kaya mula sa siyam ngayon anim na lamang sila at bukod doon ibang mga hurado na titingin sa kanilang mga galaw, mas mabusisi, at mas partikular sa kanilang nais na makita.

ANO ANG BASEHAN NG MGA HURADO SA MAGWAWAGI?

Ang mga pagbabasehan ay parang hindi nalalayo naman sa naunang panuntunan.

Iba lamang ang bahagdan o puntos na inilagay para sa mga ito upang mabuo ang isangdaang bahagdan.

Dito tiningnan muli ang Audience Impact o reaksyon ng madla sa nagkukuwento, kaledad ng boses, kabihasaan sa piyesa, at damdaming taglay sa pagkukuwento.

Sa anim na naglaban-laban para sa titulo kabilang si Althea nagbunutan muna ang mga ito. Lumaban po si Althea taglay ang bilang numero tatlo.

Naging mabusisi ng husto ang mga hurado sa pagkakataong ito.

dahil nga pagdiriwang ng Buwan ng Wika ang Agosto at may temang Filipino: Wikang Mapagbago, binigyang diin ang paggamit ng wikang Filipino.

May mga kalahok kasing hindi sinasadyang gumamit ng salitang "ingles," upang makuha ang partisipasyon ng mga manonood.

Pinuna rin ng mga hurado ang" haba ,"ng mga ginamit na salita kapag tumutugon ang mga manonood sa nagkukuwento.

Kapag madalas daw kasi ito at mahaba sa inaasahan maaring makaapekto ito sa kuwento at konsentrasyon ng taga-kuwento sa entablado.

At higit na binigyang diin pakikipagusap sa mga manonood o "eye to eye contact,' sa mga ito habang isinasagawa ang masining na pagkukuwento.

BINIGYANG DIIN DIN ANG MGA SUMUSUNOD

Sa ibang kategorya naman gaya ng sa "talumpatian," ipinaliwanag ng punong hurado na mas higit nitong pinupukaw hindi ang damdamin kundi ang isipan ng mga nakikinig kaya hindi nararapat na bawat bigkas ng salita dapat ay may katumbas na galaw.

Sa kabilang banda, sa "pagtula" naman ay damdamin ang siyang pinupukaw.

Bukod din sa pagbikas ng malinaw ng mga salita...mahalaga rin sa mga hurado ang pagbigkas ng mga ito ng tama.

MAHIGPIT ANG LABANAN...TUNGGALIAN NG MAHUHUSAY

Bagama't may iba't-bang istilo ang bawat kalahok, ito rin ang magiging basehan ng mga hurado kung sino ang karapat-dapat na magwagi.

Dahil nga pinalad si Althea na magwagi sa walo pang magaaral ng unang distrito sa baitang 3...kailangan niya itong idepensa o ipaglaban ngayon.

Kung mataas ang naunang "Expectation," o inaasahan sa kanya 'tila nadoble pa ito o higit pa.

Ngunit gaya ng lagi naming ipinapayo sa kanya..."Kung para sa iyo ito, ipagkakaloob sa'yo ng Diyos."

Hindi nakasama noon ang kanyang ina sa loob kung saan unang ginanap ang Masining na pagkukuwento...kaya naman nung masaksihan niya ito grabe daw ang kabog ng kanyang dibdib dahil sa kaba.

SI ALTHEA SA KANYANG NAKAMIT NA TAGUMPAY

Nakamit ni Althea ang "ikatlong puwesto" sa "Masining Na Pagkukuwento" na lubos naming ikinararangal. Bagama't hindi nito nakuha ang pinakaunang puwesto na talaga namang kanyang ikinalungkot ipinaliwanag na lang namin bilang kanyang mga magulang na anuman ang kanyang nakamit ay isang napakalaking karangalan hindi lamang sa kanyang sarili, sa amin na kanyang pamilya ganundin sa eskwelahan kanyang buong tapang na ipinaglaban.

At naniniwala rin kaming ganito rin ang pakiramdan ng iba...isang malaking karangalan ang irepresinta ang kanilang kagalang-galang na mga paaralan.

Muli ang aming pagbati sa lahat ng naguwi ng karangalan at lumaban at higit sa lahat sa aming ALTHEA!

Ikinararangal ka namin Anak!

Si Althea sa kanyang Masining na Pagkukuwento

"At ang nagwagi para sa pinakamahusay na Masining na Pagkukuwento...Number 7!"

Pagkarinig namin ng anunsyong iyon galing sa tagapagsalita...pumanik na agad ang aking anak na si Althea sa entablado upang kunin ang igagawad na medalya at sertipiko sa kanya.

Yun kasi ang kanyang numero, pito. Dahil siya ang ikapitong kalahok sa siyam na mga magaaral sa ikatlong baitang na galing sa distrito ng iba't-ibang eskwelahan sa lungsod ng Navotas.

Ang akala namin ng asawa ko ay siya lamang ang aakyat...pero sinenyasan kami na pumanik din. 
Umakyat ako ng stage na puno ng galak higit sa lahat ang anak naming si Althea na siyang nagkamit ng titulong pinaglabanan ng araw na yun.

PAANO NAPILI SI ALTHEA AT ANG IBA PA...

Sumali noong nakaraang taon si Althea sa isang declamation sa paggunita ng "Buwan ng Wika,'  bagama't nakuha lamang nito ang ikatlong parangal noon...ito pala ang magiging daan para ngayong taon ay maging kinatawan siya ng paaralan.

Siya kasama pa ang iba pang pinagpipitaganang mga magaaral ng Navotas Elementary School 1 (NES1), ang magiging kinatawan ng paaralan sa iba't-ibang kategorya.

May makikipagtagisan ng galing sa "Spelling," o "Iispell mo," ganundin sa larangan ng "Masining na Pagtula," nariyan din ang "Masining na Talumpati," at ang kategorya naman ni Althea na..."Masining na Pagkukuwento."

Hindi biro ang tagisan ng galing na ito dahil kailangang lumaban ng bawat magaaral kasama ni Althea sa iba pang mga magaaral na mahuhusay rin gaya nila sa mga nabanggit na tunggaliang paglalabanan.

SA MISMONG TUNGGALIAN

Isang maagang call time ang itinakda ng araw na iyon 6:30 ng umaga sa mismong eskwelahan nito. Ang naturang labanan ay ginanap sa "Kapitbahayan Elementary School," sa Navotas rin.

Halos ika-siyam na ng umaga nagsimula ang palatuntunan at ang tema ngayong taon...Buwan ng Wika, "Filipino: Wikang Mapagpabago."

Nagkaroon muna ng maiiksing programa. Ngayon ko na lang muling nasaksihan ang kilalang Philippine Folk Dance na..."Pandanggo sa ilaw."

Inilatag rin ng tagapagsalita ang napagkasunduang ng mga hurado na basehan ng mga magkakatunggaling magaaral para sa naturang patimpalak.

Narito naman ang mga panuntunan sa Masining na Pagkukuwento sa kategorya kung saan lumahok si Althea.

MGA PANUNTUNAN...

Kaledad ng boses 25

Audience Impact 15

Kabihasaan sa piyesa 35

Damdamin sa pagkukuwento 25

MGA ESKWELAHANG LUMAHOK SA NATURANG PALIGSAHAN...

-Navotas Central Elementary School

-Bagumbayan Elementary School

-North Bay Blvd Elementary School, South

-North Bay Blvd Elementary School, North

-Dagat dagatan Elementary School

-Kapitbahayan Elementary School

-San Rafael Vicente Elementary School

-Bangkulasi Elementary School

at ang eskwelahan kung saan nagmula si Althea...

-Navotas Elementary School 1 (NES1)

ANG KAKAIBANG ISTILO NI ALTHEA SA PAGLALAHAD NG

MASINING NA PAGKUKUWENTO

Ako bilang kanyang Ama na nakasaksi ng kanyang Masining na Pagkukuwento ay namangha rin.

Hindi sa dahil iniisip kong hindi ito kaya ni Althea pero iba kasi ang ipinakita nito ng mismong patimpalak na.

Walang anumang kaba ito at ganadong-ganado.

Iniisip ko nga habang kinukunan ko siya ng video ay mauutal ito, makakalimutan ang kanyang linya, mabubulol o hihinto, pero talaga namang tuloy-tuloy siya.

Habang patuloy ito sa kanyang pagkukuwento narinig ko pa nga ang isang guro sa likurang bahagi na nagkumento..."Ang ganda ng boses niya!"

Nasaksihan ko rin na halos karamihan ng mga nasa loob ng maliit na malamig na kuwarto ay nagkaroon ng partisipasyon.

May bahagi kasi sa unang pagkukuwento ni Althea na hiningan nito ng kasunduan ang mga nasa loob, na sa tuwing maririnig at bibigkasin nito ang katagang..."SIGURO," sasagot ang mga ito ng...

"PAPARAPAPAPA, PARATING NA YUN!"

Ginamit din ni Althea ang animo'y malaking entablado at nagawang paliitin ito dahil sa iba't- ibang galaw habang naglalahad siya ng kuwento.

Malinaw ang kanyang boses at nabigyan ng tamang emosyon ang bawat pangyayari habang naglalahad ng kuwento...bagay na sa tingin ko nagpaangat sa kanya sa iba.

Nang matapos ito, walang anumang palakpak na narinig pero ramdam mo sa mga hurado at mga manonood ang pagkagiliw sa kanya.

Naghintay kami ng anunsyo. Halos alas-tres na ng hapon ng ihayag ang mga nagwagi.

MGA SAKRIPISYO NI ALTHEA

Kagaya ng lumang kasabihan na..."Kung walang tiyaga, walang nilaga," ganitong-ganito ang ginawa ni Althea para makamit ang kanyang tagumpay.

Maagang ibinigay ang babasahing kuwento sa kanya na pinamagatang..."Bakit matagal ang sundo ko? sa panulat ni Kristine Canon at guhit ni Mariano Ching. 

Madalas nga kapag bumibisita kami sa bookstore, pupunta ito sa lugar kung saan naroon ang mga libro at magbabasa.

Hindi ko alam pero tila alam nito ang lugar kung saan nakalagay ang babasahing ito.

Bago pa sila halos araw-araw na magsanay pagkatapos ng klase nito nung papalapit na ang naturang kumpetisyon, nageensayo na rin ito sa bahay.

At pagkatapos ng pagsasanay nito makikita mo ang hapong-hapo nitong katawan na agad na hahanapin ang kanyang higaan upang ipahinga ang lupaypay na katawan.

Nakatutok ng husto sa kanya ang kanyang guro na si Ginang Marcelino. Bukod pa dito ang pagsasanay na ginagawa nito sa bahay, ensayo sa harap ng kanyang Lolo Bert at kung kani-kanino pa.

Hindi man ako nakatutok ng husto sa kanya ngayon...ito naman ang bahaging tunay namang tinayaga ng aking asawa, ang kanyang ina na si Meanne.

Naghahatid sa kanya sa school, nagluluto at nagdadala ng pagkain dito at siyang tutok rin at punong-puno ng gabay sa pagsasanay ni Althea sa araw-araw.

Sa sobrang hirap at pagod nagkaroon na ito ng sugat sa katawan. Lumalabas kasi ang mga ito kapag ibinibigay niya ang higit pa sa isangdaang porsyento ng kanyang lakas.

Naaawa kami bilang magulang nito, pero nakikita naman namin ang buo niya determinasyon at pagmamahal sa kanyang ginagawa kaya kami naman ay patuloy ang pagbibigay ng suporta sa kanya.

Alam namin na hindi pa ito ang huling kumpetisyon na lalahukan niya dahil may paghahanda na naman itong kailangang gawin para sa nalalapit na "Division Contest," sa darating na Biyernes.

Lagi lamang kaming naririto at gagawa lagi ng paraan para masaksihan ang anumang pagtatanghal na iyong gagawin.

Ikinararangal ka namin Althea!